Ranad’s Blog

تجربتي في السنة التحضيرية – مسار صحي – جامعة الإمام عبدالرحمن بن فيصل

“فالّذي خَلَقَ الطريق الصَّعب خَلَقَ فيكَ القوّة على اجتيَازِه”

بسم الله الرحمن الرحيم

السلام عليكم ورحمة الله وبركاته، معاكم رناد عبدالعزيز طالبة سنة ثانية طب، حابة أنقل لكم تجربتي الشخصية في السنة التحضيرية – مسار صحي في جامعة الإمام عبدالرحمن بن فيصل. في هذه المدونة راح أتكلم عن طريقتي بمذاكرة كل مادة، والصعوبات اللي واجهتني وكيف قدرت أتغلب عليها، وأيضًا عن المصادر اللي ساعدتني في اجتياز هذه المرحلة

بدايةً، المواد تنقسم إلى قسمين : مواد سنوية و مواد فصلية

المواد السنوية : هي مواد تُدرس على مدار السنة بحيث إن الحصول على درجات فيها راح يكون أصعب شوي من المواد الفصلية، لأنك راح تحاول تجمع درجاتك خلال السنة كاملة، مثال

عشان تجيبها بمادة سنوية لازم طول السنة ما تنقص عن ٥ درجاتA+

المواد السنوية هي : مقرر اللغة الإنجليزية العامة / مقرر الأحياء / مقرر الكيمياء / مقرر الفيزياء

المواد الفصلية : هي مواد تُدرس خلال ترم واحد سواءً في الترم الأول أو في الترم الثاني، هذي راح تكون أسهل عليكم الحصول فيها على درجات وأيضًا قريدك في هذي المادة راح يطلع نهاية الترم وليس نهاية السنة

المواد الفصلية هي

الترم الأول : مقرر الدين / مقرر الحاسب الآلي / مقرر مهارات التعلم

الترم الثاني: مقرر اللغة العربية / مقرر اللغة الإنجليزية التخصصية / مقرر مهارات التواصل / مقرر البدنية

مقرر اللغة الإنجليزية العامة | ٧ ساعات

بدايةً، مقرر اللغة الإنجليزية العامة هو من أهم مواد السنة التحضيرية في المسار الصحي لأن عليه ٧ ساعات من المعدل، بحيث أنه راح يأثر بصعود ونزول معدلك، لذلك المادة تحتاج إلى تدريب مكثف في جميع المهارات

( مهارة القراءة ، مهارة الاستماع ، مهارة الكتابة ، مهارة التحدث )

قبل بداية الدراسة راح يكون فيه اختبار تحديد مستوى للغة الإنجليزية، راح يحددوا مستواكم ويتم تصنيفكم إلى

مبتدئ ( Beginner )

متوسط ( Intermediate )

متقدم ( Advance )

الاختبار مستواه عادي جدًا ويناسب مستواكم كخريجين ثانوية لذلك لا تخافون أبدًا ومهم أنكم تحلون على اللي تعرفونه عشان تحصلون المستوى المناسب لكم، بالنسبة لي حليت اللي أعرفه وأخذت مستوى متوسط وكان جدًا مناسب لأنه مستواي

طريقة مذاكرتي

كنت أعطي وقتي لمادة الانجليزي لو نص ساعه أو ساعة بيومي، استغلوا بداية السنة انكم تكرسون وقتكم لهذي المادة خصوصًا بالفوكاب كنت أحفظهم أول بأول عشان ما يتراكمون علي وقت الميد تيرم، كنت أستخدم هذا الموقع للترجمة وفادني كثير

https://www.ldoceonline.com/

أما بالنسبة لطريقة مذاكرتي بكل مهارة ف هي كالتالي

مهارة القراءة ( Reading )

مهارة القراءة مهمه جدًا خصوصًا بوقت الإختبار، لانها تحتاج فهم عميق بوقت قصير .. لذلك لازم تقرون قطع وتحلون عليها اسئلة لان القطع اللي تجي بالإختبار تكون طويلة وتحتاج وقت ! لازم تحطون لكم تايمر معين بحيث انكم مثلًا تقرون القطعه سريع وتحلون عليها ١٠ اسئلة في نص ساعة. لان باختبار اللغة الإنجليزية انت تقسم وقتك بنفسك لكل مهارة، وغالبًا مهارة القراءة هي اللي تاخذ معظم الوقت لذلك لازم تتدربون عليها كويس. بالنسبة لي، كنت أستخدم مواقع للقراءة لأن قطع الكتاب كانت سهلة جدًا والاختبار يجي أصعب منها بكثير .. لذلك كنت أحرص إني أتدرب على قطع خارجية. من تجربتي الشخصية في التعامل مع مهارة القراءة بالاختبار : كنت أبدأ فيها قبل أي شيء لانها تاخذ معظم الوقت، أشوف التايمر قدامي وأحسب لي ٣٠ د او ٤٥ د كحد أقصى، أقرأ الاسئلة قبل اقرأ القطعة، اذا قريت السؤال الأول أروح أدور على الموضوع اللي تكلم عنه في السؤال واحدد البراقراف واجلس ادور الاجابة.. وهكذا سؤال وراء سؤال . ( ملاحظة ) : هذي طريقتي الشخصية في التعامل مع الاختبار، مو شرط تكون الأساس أو الصح لكن حبيت أنقل لكم تجربتي وتعاملي مع مادة اللغة الإنجليزية، وبالنهاية كل طالب له طريقته الخاصة

المواقع اللي كنت أستخدمها لمهارة القراءة

– https://englishteststore.net/index.php?

– option=com_content&view=article&id=236&Itemid=318

– https://readtheory.org/

مهارة الاستماع ( Listening )

هذي المهارة نقدر نطورها بوسائل عديدة وخصوصًا بوقت الإجازة لأن كل اللي تحتاجونه هو أنكم تستمعون، سواءً لمسلسلات أو أغاني أجنبية وبكذا بتقدرون تدربون أذنكم إنها تسمع، خصوصًا الحوارات السريعة، لأن غالبًا المقطع اللي يحطونه لكم بالإختبار يكون سريع .. لذلك لازم تسمعون أكبر عدد ممكن من الكلمات بوقت محدود، أنا شخصيًا كنت أتدرب على هذي المهارة أيضًا من مواقع مفيدة، اذا ما قدرت أسمع الكلمات الموجودة بالريكورد عشان أجاوب على الاسئلة كنت أعيده مرة ومرتين وثلاث عشان أعوّد أذني .. في الاختبار هم يحددون وقت الاستماع متى راح يكون، عشان يشغلون الريكورد وطبعًا يقولون لكم ان مثلًا دقيقتين ونشغل الريكورد اقروا الاسئلة، أنتوا وقتها لازم تقرون الاسئلة كويس، راح تكون ١٠ اسئلة، ولكم فرصتين للإستماع، يعني راح يشتغل التسجيل مرتين

المواقع اللي كنت أستخدمها لمهارة الاستماع

– https://www.esl-lab.com/

– https://learnenglish.britishcouncil.org/skills/listening

مهارة الكتابة ( Writing )

هذي المهارة تحتاج منكم تدريب كبيييير، حاولوا ما توقفون أبدًا عن التدريب، بحيث أنكم تكتبون كل أسبوع عن موضوع، مع الممارسة بيصير عندكم أسلوبكم الخاص، وهذي المهارة مهمه جدًا لأن عليها اسايمنتات عليها ١٠ درجات داخله بقريد المادة، كل اسايمنت عليه درجتين أو ثلاث تقريبًا، لذلك بتشوفون نفسكم بعد كل اسايمنت تطورت هذي المهارة عندكم، كل المطلوب منكم أنكم تكتبون عن أي موضوع كتدريب، وطبعًا بالاختبار يعطونكم ٣ خيارات ( ٣ مواضيع ) وأنتم تختارون واحد وتكتبون عنه، المواضيع من مواضيع الوحدات الموجودة بالكتاب لذلك لازم تدورون أفكار عن كل يونت موجود بالجزئية المحددة للاختبار لأن راح يجيبون مواضيع عنها، طريقتي بمذاكرة هذي المهارة كانت أني أحرص كل ويكيند أكتب موضوع بحيث أني بداية الاسبوع أروح لأحد الدكاترة الموجودين بمصادر التعلم وأطلب منهم تقييم للرايتنق حقي، طبعًا نصيحتي استفيدوا من مركز مصادر التعلم قد ما تقدرون لأنه كنز التحضيري والله العظيم، بكل المواد بشكل عام وأيضًا بالانجليزي لأنهم راح يساعدونكم بتقييمهم للرايتنق حقكم أنكم تطورون من مستواكم وتكتشفون أغلاطكم وبنفس الوقت راح يكون كتدريب لكم. وبالنسبة للمواقع صراحةً كنت أمسك أي موضوع بأي يونت واكتبه بقوقل وتطلع لي عنه مجموعة من القطع المكتوبة وبكذا أستفيد من الأفكار، كنز مهارة الكتابة هي الأفكار لذلك احرصوا أنكم تدورون أكبر عدد ممكن من الأفكار

مهارة التحدث ( Speaking )

مع إن كثير من الطلاب متعقدين من هذي المهارة إلا إنها كانت أسهل مهارة بالنسبة لي، والحمدلله قدرت أمارسها بشكل سليم. الطريقة هي : كنت أمسك نوت وأكتب براقراف قصير عن أي موضوع من الكتاب لأن أيضًا باختبار مهارة الاستماع يجيبون من مواضيع الكتاب، كنت اكتب جملتين كمقدمة أو جملة، مهم جدًا جدًا أنكم تذكرون مقدمة أو تعريف عن الشيء اللي بتتكلمون عنه ويفضل يكون تعريف لأنهم يهتمون لهذي النقطة، أكتب مثالين، وأختم بنصيحة. هذي الطريقة كانت من دكتورة عندنا الله يذكرها بالخير، وحرفيًا هذي الطريقة مهمة ويركزون عليها وقت الاختبار ( مقدمة عن الموضوع، أمثلة، خاتمة ) وطبعًا الطلاقة مهمة والثقة بالنفس، وحاولوا تذكرون فوكاب مميز عن الموضوع عشان تلفتون انتباه المستمع وتحصلون درجة عالية، المهارة هذي كل اللي تحتاجه ثقه وأموركم بتمشي بالسليم

Grammar and Vocabulary

بالنسبة للكلمات ذكرت مسبقًا أن حفظها أول بأول مهم، لأن لما يحددون لكم جزئية الاختبار راح تلاحظون إن كمية الكلمات كبيييرة جدًا وتحتاج وقت عشان تنحفظ، لذلك تلاحقوا الموضوع من البداية، ذكرت موقع مهم للترجمة، راح يساعدكم لأن الاسئلة بالاختبار عن الكلمات راح تكون إما معنى وانتي تختارين الكلمة المناسبة، أو تكملين الجملة اللي بالسؤال بالكلمة المناسبة، ف يحتاج منكم انكم تفهمون الكلمة وتحفظونها، وانتبهوا ان للكلمة الوحدة أكثر من معنى، نصيحتي اعرفوا تعددات المعاني للكلمة الواحدة، عشان ما تواجهكم مشكلة وقت الاختبار وتحطون الاجابة والمعنى الخطأ

أما بالنسبة للقواعد، طريقتي فيها اني كنت افهم كل قاعدة وألخصها عشان تكون أوضح بالنسبة لي، القواعد كانت أسهل شيء بالنسبة لي لأن غالبًا تجي واضحة ومباشرة ف كل اللي تحتاجونه انكم تفهمون، وكنت أكتب اسم أي قاعدة بقوقل وجنبها براكتس وتطلع لي مواقع كثير فيها اسئلة تدريب على القاعدة

مثل ما شفتوا مادة اللغة الإنجليزية مادة مهمة جدًا وتحتوي على أكثر من مهارة، نصيحتي لكم لا تشوفونها صعبه لأنكم ما راح تقدرون تواجهونها إذا اقنعتوا نفسكم إنها صعبة ومعقدة، صح عليها ساعات كثير بالمعدل لكن أيضًا المواد الثانية مهمه ! باختصار عطوها حقها بالمذاكرة وراح تقدرون تعدونها بأقل خسائر ممكنة

مقرر الأحياء | ٥ ساعات

مقرر الأحياء هو ثاني أهم مادة بعد الانجليزي، وأمتع مواد التحضيري بالنسبة لي، أول شيء حابه أنوّه عنه هو أن مادة الأحياء ما تعتمد على الحفظ، لأن أحياء الجامعة يفرق عن أحياء الثانوي من ناحية أن المعلومات أعمق بكثير ف تحتاج لفهم وتركيز. الترم الأول راح تكون المواضيع كمقدمة للأحياء بتتكلم عن الخلايا وأنواعها والمركبات العضوية مثل الاحماض النووية وغيرها، أما الترم الثاني راح تاخذون بعض الاجهزة في جسم الانسان وهو الأمتع. طبعًا بتكلم عن الجزء النظري والجزء العملي بمادة الأحياء

الجزء النظري

طبعًا مادة الأحياء بتاخذونها يومين بالاسبوع، والمحاضرة الوحدة طبيعي انكم تخلصون تشابتر كامل أو حتى النص، ف يحتاج منكم أنكم تذاكرون وتفهمون وتحفظون أول بأول، مصادر المذاكرة هم مصدرين أساسيين: السلايدات والكتاب ثم الكتاب ثم الكتااااب. شخصيًا كنت أبدا بالسلايدات أفهمها كويس وأحفظ الاشياء اللي تحتاج حفظ، وأخلي جزئية الكتاب بالويكيند، يعني ما يخلص الاسبوع الا وانا مختمه التشابتر من السلايدات والكتاب، طبعًا ركزت على الكتاب لان فيه معلومات واجد تكون مو موجودة بالسلايدات لكن موجودة بالكتاب وهي اللي غالبًا تجي بالاختبار، ف مذاكرة السلايدات بدون الكتاب ماراح تفيدك بأي حاجة. وراح ينزل لكم ستدي قايد قبل كل ميد تيرم فيه الجزئية المحددة بالكتاب وهالشيء راح يسهل عليكم. طبعًا كنزي الجميل بالبايو هو اليوتيوب. المقاطع خصوصًا بالعمليات اللي تكون طويلة وتحتاج فهم كنت افهمها من اليوتيوب وفيه قنوات كثير ساعدتني. ما كنت اكتفي بالسلايدات والكتاب كنت اشوف مقاطع عشان اثبت فهمي وبكذا كانت اختبارات مادة الاحياء جدًا سهله بالنسبة لي، صدقوني هذي المادة بتكون لكم المصبّر على السنة التحضيرية إذا مشيتوا فيها صح. الاختبارات كلها اختياري، ونصيحة اقروا السؤال كويس كويس كويس لأن أحيانًا مغزى السؤال كله بنهاية السؤال.. وانتم تقرون البداية بس بعدين تحطون الاجابة الغلط .. هذي النقطة مرة مهمه

القنوات اللي استفدت منها بمادة الأحياء

قناة الطالب يوسف العويشري ( طالب سنة رابعة طب ) https://www.youtube.com/channel/UCRafI0sXTmqhaq3mIL2sgKA

قناة الطالب عمر الظاهر ( طالب طب في جامعة الملك فيصل )

https://www.youtube.com/channel/UC4o9ipeeMpEvpOUy9yXewuQ

قناة أميبا سسترز

https://www.youtube.com/channel/UCb2GCoLSBXjmI_Qj1vk-44g

الجزء العملي

وقت اللاب راح يكون مرة بالاسبوع. أسبوع فيه وأسبوع لا. حسب جدولك، يعني مثلًا أنا كان وقت اللابات حقتي كلها بالأسابيع الفردية، يعني باسبوع ١ و٣و٥ وهكذا كان يصادفني لاب أحياء. عملي الأحياء كمحاضرة بالمعمل جدًا ممتع راح تتعرفون على شرايح وتسوون تجارب بعض الأوقات، نصيحتي لكم ركزوا على الشرايح اللي تتعرفون عليها وقت اللاب لان هي اللي راح تجي بالاختبار. طبعًا اختبار اللاب راح يكون فقط اختبارين. اختبار نهاية الترم الأول، واختبار نهاية الترم الثاني. الشرايح اللي تشوفونها بالمجهر راح تكون بالمانول، يعني كل اللي عليكم اذا قرب وقت الاختبار تحفظون شكل الشرايح كويس وبشكل دقيق، والأهم احفظوا اسماء الشرايح كويس وبدون اختصارات لانهم بيحاسبونكم عليها وعلى السبلينق بعد، عملي الأحياء سهل انكم تجيبون فيه درجة عالية لذلك احرصوا أنكم تذاكرون الشرايح كويس وتتدربون كيف تضبطون المجهر لان بعد عليه درجة باختبار الترم الأول. تذكروا ان العملي داخل من درجاتكم بالقريد لذلك حاولوا تجيبون درجات عالية فيه

مقرر الفيزياء | ٣ ساعات

أول شيء من ناحية هذي المادة لا تسمعون من غيركم أبدًا، لأن كثير بتسمعون ( مادة صعبة، مستحيل تجيبون فيها درجة، مادة مستحيلة، أصعب مادة بالتحضيري ) لكن جربوا تحكمون عليها بأنفسكم لأن مع المذاكرة بتسهل كثييير. بالنسبة لي، ما كنت متطمنه من ناحية المادة لكن قدرت أتخطى مخاوفي منها بالتدريب. طريقتي كانت إني أفهم المفاهيم الأساسية من السلايدات، لان السلايدات كلها عبارة عن مفاهيم أو قوانين فقط. التدريب كله يعتمد على الكتاب، اسئلة الكتاب مهمه جدًا جدًا وأيضًا اسئلة البوست كلاس اللي موجودة بالسلايدات لانهم يجيبون نفس أفكارها. المادة كليًا تعتمد على الفهم، حاولوا تفهمون والفهم لحاله ما يكفي لأن الفيزياء أغلب اسئلته بالاختبار تعتمد على معادلات وأرقام أو مفاهيم اساسية تعتمد على مدى فهمك للفكرة. طبعًا الاختبار كله اختياري، حتى المسائل اختيارية، لا تحطون هذي المادة حاجز لكم اذا واجهتوا فيها صعوبة حاولوا تستعينون بمدرس، أهم شيء تفهمون عشان تقدرون تمشون فيها. بالنسبة لي ما كنت أفهم من دكتورة المادة أبدًا، كنت أعتمد على مقاطع د. نزيه شرحه جدًا مفهوم ويوصل المعلومه بشكل سلس، بكذا أكون فاهمه والباقي علي التدريب. أيضًا كمصدر مهم هي أوراق مراجعة د.محاسنه، تجي عليها أفكار كثيرة بالاختبار.. طبعًا كل المصادر اللي ذكرتها تقدرون توصلون لها من طلاب السنوات الماضية. طبعًا الفيزياء راح تاخذونه مره في الأسبوع، لذلك سهل انكم تتداركون المحاضرات وتذاكرونها أول بأول

ثانيًا، الجزء العملي راح يكون نفس نظام جميع اللابات، اسبوع فيه واسبوع لا، حسب جدولك. الاختبار حقه راح يكون اختبار واحد، نهاية السنة. الاختبار كليًا يعتمد على التجارب، لان بمحاضرات العملي راح تاخذون تجارب، وتطبقونها، وأيضًا ترسمون قراف اذا تطلبت التجربة، مهم تفهمون كل تجربة بأدواتها وحساباتها، لان بالنهاية راح تختبرون فيها. كل المطلوب منكم تركزون بوقت المعمل مع الدكتورة وهي تشرح التجربة وتحتفظون برسمكم عشان تذاكرون منه للاختبار، وأيضًا بعض الدكاترة يسوون لكم مراجعة اذا قرب الاختبار لان بيكون صعب عليكم تتذكرون تجارب الترم الاول والثاني، المانول للاب الفزكس عليه ١٠ درجات و ١٠ درجات للاختبار. لذلك مهم تجيبون بالعملي درجة عشان تحافظون على قريدكم بمادة الفيزياء

مقرر الكيمياء | ٣ ساعات

مادة ممتعة ومريحة بالمذاكرة جدًا، شخصيًا أحب الكيمياء وأشوفها مادة سهلة لذلك ما كنت أذاكرها يوميًا صراحة، بالترم الأول كانت كيمياء عامة تتكلم عن المركبات والتوزيع الالكتروني والجدول الدوري. أما الترم الثاني كان كيمياء عضوية والصراحة الاسئلة فرقت علينا عن الترم الأول، لأن الكيمياء العضوية معلوماتها عميقة، ف كنت أحرص اني اذاكرها أول بأول وما أراكم المعلومات، بمذاكرتي للكيمياء كنت استخدم مرجع واحد وهو السلايدات، تكفي وتوفي، الكتاب ما استفدت منه أي شيء، اللي يبي ياخذه يقدر ياخذه كتدريب زايد بس شخصيًا ما كنت أشوف أنه مهم. المهم واللي يخليكم تتدربون صح هي أوراق العمل اللي بتنزل لكم لكل تشابتر بالبلاك بورد، حلوة للتدريب وفيها كل الافكار وتجي نفس الافكار بالاختبار. الكيمياء عمومًا يحتاج فهم بسيط وأمورك بتمشي تمام. طبعًا مادة الكيمياء راح تاخذونها مرة وحدة بالأسبوع. كل اللي أقدر أقوله حول هالمادة أنكم لازم تركزون بفكرة السؤال، خصوصا بالترم الثاني تحتاجون تدريب ثم تدريب ثم تدريب لان بيحتاج منكم رسم وتسمية للمركبات. فيه قنوات حلوة للتدريب كنت أستخدمها وقت المراجعة عشان أأكد معلوماتي فيها

https://www.youtube.com/channel/UC4a-Gbdw7vOaccHmFo40b9g –

https://www.youtube.com/channel/UCEWpbFLzoYGPfuWUMFPSaoA –

بالنسبة للجزء العملي في مادة الكيمياء راح يكون عبارة عن تجارب والمواضيع مختلفة تمامًا عن النظري، ومثل نظام لاب الاحياء والفيزياء، اسبوع فيه لاب واسبوع مافيه، حسب جدولك. بالنسبة للاختبارات فيه اختبارين، نهاية الترم الاول ونهاية الترم الثاني. كلها سهلة تعتمد على التجارب اللي بتسوونها بالمعمل. أحيانًا بتحتاجون قراف، بتجربة وحدة صادفنا، بالنسبة لي أسهل عملي كان عملي الكيمياء لان ما يتطلب منك الكثير وسهل ينفهم وممتع

المواد الفصلية

مقرر اللغة الإنجليزية التخصصية | ٣ ساعات

هذي المادة ممتعة بمصطلحاتها، لانكم بتاخذون فيها مصطلحات طبية وتكون جديدة عليكم وبنفس الوقت ممتعة، تعتبر أسهل من مقرر اللغة الإنجليزية العامة من ناحية اختباراتها ومواضيعها. طبعًا تنقسم إلى قسمين

ESP / EAP

ESP

راح يكون للمصطلحات وغالبًا المصطلحات راح تكون قريبة من اللي بتاخذونها بتخصصاتكم لذلك مهم تحفظونها

EAP

راح يتضمن ريدنق ورايتنق وقرامر، وراح يكون فيه اسايمنتات لازم تسوونها لذلك لازم تتدربون على الكتابة هنا بعد، القرامر هنا أسهل بكثييير من الانجليزي العام وأيضًا الريدنق لان مواضيعه أمتع

الاختبارات في هذي المادة راح تتضمن

Vocabulary / Grammar / Reading / Writing

Vocabularyوأغلب الاسئلة بتكون

مقرر الحاسب الآلي | ساعتين

ان شاء الله فيها A+ مادة سهلة جدًا تقدرون تجيبون

الجزء النظري يحتاج حفظ عن نفسي كنت اذاكره قبل الاختبار بكم يوم لان الجزئية تكون كبيرة أما الجزء العملي سهل جدًا لانكم بتتدربون مع الدكتورة بالمحاضرة وتجي الاسئلة نفس ما انتوا تدربتوا عليه

مقرر الدين | ساعتين

الدين كان عبارة عن كتابين اسم الكتاب الأول ( مختصر توضيح العقيدة الإسلامية ) أما الكتاب الثاني ( الأسرة في الإسلام ) طبعًا الكتب تقدرون تشترونها من الجامعة ومتوفرة أيضًا بمكاتب برا الجامعة، نص المحاضرات حضوريًا ونصها أونلاين، فيها مهام وواجبات ومحاضرات لازم تشوفونها أونلاين وأيضًا كويزات، المادة تحتاج حفظ و انجاز المهام المطلوبة فقط

مقرر اللغة العربية | ساعتين

المادة ما لها كتاب، ونفس نظام الدين لها مهام وواجبات ونص المحاضرات أونلاين والباقي حضوري، وأيضًا كويزات، بالنسبة للاختبارات راح تكون عن القواعد الاملائية وهكذا مصادر المذاكرة هي الملخصات الموجودة بالبلاك بورد أو ملخصات الطلاب

فيها A+ المادة سهلة جدًا وسهل انكم تجيبون

مقرريّ مهارات التعلم ومهارات التواصل | ساعتين

A+ طبعًا المادتين قريبين من بعض لذلك دمجتهم لان ينطبق عليهم نفس الكلام، من المواد السهلة أيضًا فيها

تقريبًا نفس مهارات الثانوي بس انها باللغة الانجليزية، كلها مواضيع عن التواصل والمهارات وهكذا، صراحةً ما كنت اذاكرها الا قبل الاختبار بيوم واذا كثرت يومين، النقطة المهمة فيها هي الكويزات، الكويزات عليها ٥ درجات لذلك مهم تجيبون ال٥ لان سهله ولانه راح يكون اونلاين يعني سهل انك تتداركين الوضع، وأيضًا فيها مشروع. بالنسبة للاختبار النهائي في هذي المادتين فيه جزء اختياري وفيه مقالي، المقالي سوووواااالف اكتبي وعبري عن الموضوع على راحتك لان المواضيع كلها سهلة

مقرر البدنية | ساعة وحدة

أول شيء هذي المادة تختلف من طالبات إلى طلاب من ناحية المواضيع لذلك انتبهوا انكم تاخذون المصادر الصح لمذاكرتها، مادة خفييفة تنقسم إلى نظري وعملي، النظري اختبار كله اختياري وسهل، أما العملي راح تمارسون رياضة مثل الركض والسيت أب وهكذا، والاختبار سهل ما يحتاج تدريب حتى

نصائح مهمة

أهم ما في السنة التحضيرية هو تنظيم الوقت، لأني كنت بمستوى متوسط كان يصادفني أسابيع بكل أيامها أطلع الساعه ٥، أوصل البيت على ٦ أو ٦ ونص لذلك لازم أنظم وقتي للمذاكرة والنوم. طريقتي بتنظيم وقتي هي أني نهاية كل يوم لازم اكتب المهام، بالتفصيل، وأبدأ بالأهم، وأهم من هذا كله إني ما كنت أسمح للجوال بأنه ياخذ نصيب من يومي، عادي تمر أيام ما تنامون فيها إلا ساعتين .. الأهم كان بالنسبة لي إني أخلص مهامي من مذاكرة وواجبات وبحوث وكويزات، تنظيم الوقت بيسهل عليكم وأيضًا بيبعدكم عن التشتت لذلك احرصوا انكم تنظمون وقتكم

دراستكم بالسنة التحضيرية للمسار الصحي خصوصًا ما تعني أنكم راح تخسرون جوانب كثيرة بيومكم، متعّوا أنفسكم ولو بساعة أو نص ساعة، مو كل الوقت راح يكون للمذاكرة لأن نفسك لها حق عليك، أيضًا ساعة مع أهلك مهمة جدًا بحيث أن يومكم راح يكون يا للجامعة يا للمذاكرة، اختاروا يوم بالأسبوع على الاقل تطلعون فيه أو تمارسون شيء تحبونه، مهم توازنون بين الاشياء اللي تحبونها والمذاكرة عشان تقدرون تكملون وتحققون اللي تبونه

مهم تستفيدون من مركز مصادر التعلم الموجود بمبنى التحضيري لانه راح يساعدكم وقت ما تكونون مو فاهمين أي معلومة وتحتاجون شرح وافي لها .. راح ينزل لكم جدول على البلاك بورد فيه اسامي كل الدكاترة اللي يدرسون بالمسار الصحي، تقدرين تروحين لأي دكتورة حتى لو ما تدرسك وهالشيء مميز لانه بيخليك تفهمين المعلومه اذا واجهتك مشكلة مع دكتورة مادة معينة، شخصيًا كنت اعتمد عليه دايم بحيث اني أحدد الجزئية اللي مو فاهمتها بأي مادة وأروح للدكتورة اللي أرتاح لشرحها، والدكاترة هناك أبد ما يقصرون وبالعكس بتشوفونهم ينتظرونكم عشان تجون وتسألون ! لذلك استغلوا الفرصة المفيدة هذي

أيضًا مهم تتنوعون بمصادر المذاكرة وطريقتها، لكن مو أي تجربة ممكن تكون الأنسب لكم .. تجربتي ممكن راح تساعدكم وتعطيكم نظرة لكيفية مواجهة السنة التحضيرية لكن مو شرط تُطبق طبق الأصل

النهاية

وبكذا أكون انتهيت من نقل تجربتي الشخصية لكم، أتمنى تكون مفيدة .. السنة التحضيرية ممكن تكون صعبة وشاقة على النفس لكن بالنهاية بتكتشفون أنها الطريق الأساسي للوصول إلى هدفكم المستقبلي. توكلوا على الله واستودعوه أحلامكم .. واعملوا بالأسباب واجتهدوا

مستعدة أستقبل جميع استفساراتكم على تويتر

@Rvnvvd